Snjór hjá danskanum

Hér snjóaði bara svo fallegum snjókornum í fyrri nótt og vöknuðum við bara upp við hvíta jörð, sem var svo fallegt en mikið djöf... var kalt.  Enda voru ummæli veðurfréttamannsins í morgunsjónvarpinu á þá leið að það væri um fimm gráðu frost en vegna vindkælingar mætti líta svo á að um 15 gráðu frost væri að ræða. 

Ég bjóst við því að póstburðardrengurinn myndi banka uppá hjá mér í gær þar sem ég átti von á pakka með námsbókum sem Siggi stóribróðir minn var búinn að græja fyrir mig að heiman.  Ég bjóst hins vegar ekki við tveimur pökkum.  Það fóru margar hugsanir gegnum hausinn á mér á þessum tveimur sekúndum sem ég hafði til að líta á pakkana áður en hann krafðist undirskriftar minnar.  Ég pantaði nefnilega eina litla bók í gegn um Amazon netbókaverslunina en fannst ótrúlegt að hún kæmi í svona stórum umbúðum.  Ég hugsaði líka á sömu sekúndunni hversu vitlaus ég gæti verið þar sem þetta voru báðir póstbögglar frá Póstinum og Amazon sendir alveg örugglega ekki í gegn um póstinn á Íslandi... eða hvað veit maður sossum .  Hann var nú líka alveg töluvert stór þessi sem um ræðir, og miklu stærri en bókakassinn frá Sigga. 

Ég skoðaði hann allan sundur og saman og sá að Valgerður hafði skrifað sig fyrir honum.  Það var gaman að opna bókakassann og sjá allar nýju námsbækurnar sem ég á að lesa þessa önnina en OMG (lesist ,,ó mæ god".. fyrir þá sem ekki eru kunnugir msn-máli eða öðru tölvumáli) hvað var gaman að opna pakkann frá Valgerði og Jóni.  Ég tók upp góðgæti sem aðeins þeir sem upplifað hafa að búa í útlöndum geta skilið hvað er gaman að fá.  Frón-sæmund á sparifötunum (kremkex fyrir þá sem ekki sáu úrslitaþátt Útsvars í fyrra ) Kaffi frá Te og kaffi, alls kyns kryddblöndur til að bragðbæta kjötið hér á landi  og fleiri íslenska rétti eins og Cocoe puffs og Oreo kex og BarbeQ sósu... og Halldóri til fullkominnar hamingju.... E. Finnsson kokteilsósa!!!  Ekkert lítið sem minn var hamingjusamur þegar hann opnaði ísskápinn!!!

Þið eruð hér með og opinberlega tekin í guðatölu . 

Nei... hringurinn finnst ekki  og ég er nú farin að hafa smá áhyggjur af því að finna hann ekki.  Reyndar vorum við Eysteinn að kósíast saman í kvöld og nördast svolítið í eeeeldgamalli bók sem við Siggi áttum, eitthvað um tækni og hvernig allt virkar og sáum þá hvernig rafsegull er búinn til.  Það virtist ekki svo flókið .  Kannski maður smelli bara saman einhverju af þessu málmdrasli sem við höfum fundið í garðinum og vefji svo bara einhverjum vírnum sem við höfum fundið líka og stingum því svo bara í samband.  Ætti maður ekki að geta sogið upp hvaða málm sem er í garðinum þannig?   Kannski við náum bara að tína endanlega alla vírbútana sem eftir eru af gömlu girðingunni og fáum þá kannski verðlaun fyrir hreinasta garðinn í Köben? -Nú eða að við náum þá að safna nægilegu klinki úr garðinum til að kaupa annan hring... hehe.  

Af fleirum fréttum er það.... uh.. að frétta  að ég tók mig til og klippti stelpukollinn hérna um helgina. Líurnar voru orðnar svo síðar eitthvað að ég bara gat ekki horft upp á þetta lengur.  Það verður nú svo sem engin meistaraklipping sem maður nær að gera með hana á hreyfingu allan tímann og reynandi að bægja greiðu og rakgræjum í burtu frá sér en það er bara mesta furða hvað ég náði að gera samt.  Hún er ægilega mikið skott svona nýklippt .  Alveg ótrúlegt líka að sjá öll hárin sem eru að koma.  Hún verður sko ekki með hárið úr móðurættinni þessi, svo mikið er víst! Tek myndir af nýju klippingunni  bráðlega.

Halldór er bara búinn að vera niðri í Óperu síðan á föstudag svo að segja og er alsæll.  Litli vinnualkinn minn loksins að komast í almennilega vinnu.  Svo ég vitni nú í hann: ,,Ég er eiginlega ekki búinn að vinna neitt að ráði í bráðum eitt ár!"  (Þýðing: Ég hef náttúrulega ekki fengið að vinna 16 tíma vinnudag síðan áður en ég tók fæðingarorlofið).  En það var frumsýnt í kvöld og gekk svona líka ljómandi vel hjá honum.  Hann er núna að halda upp á það ásamt frumsýningarkollegum .  Ég er að vonast til að sjá sýninguna á föstudaginn og taka þá jafnvel Sigrúnu og Andy með mér.  Ég hlakka alveg rosalega mikið til!!!  Enda um hreint frábæra sýningu að ræða.

Jæja, svo ég endi á svipuðum nótum og í síðustu færslu:

Fleira er ekki í fréttum að þessu sinni.

Verið þið sæl! 

 

Afmæli - framhald, súkkulaði og fleira (nema ekkert súkkulaði).

Já, Halldór fékk sokka og nýjan bol í afmælisgjöf svona með morgunkaffinu .  Hann var viðbúinn því að stökkva út þegar Bernd myndi hringja, enda gamall skáti (ávallt viðbúinn!) en hann gerði það ekki svo hann fór bara í dönskutíma seinnipart dags.  Áður vorum við búin að eyða nokkrum klukkutímum í það að skanna garðinn með málmleitartækinu í leit að gulli.  En allt kom fyrir ekki.  Við fundum hins vegar allar skrúfur, held ég, sem til voru í garðinum, endalaust af vírum úr einhverju sem virtist vera gömul girðing milli garða, fullt af myntum (förum að ná upp í annan hring, svei mér þá) og nokkrar járnkúlur.  Tækið virkar þó allavega .  Við fórum ekki inn fyrr en komið var kal á tærnar og tækið orðið batteríslaust.  

En sem sagt Halldór fór svo í dönskutíma en kom heim í hálfleik (hléinu) þar sem við Eysteinn vorum búin að dekka borð og kveikja á kertum og hann fékk hakkabuff og lauk í afmælismat.  Hann var ekki dapur yfir því.  Þá komum við með restina af gjöfunum.  Eysteinn hafði búið til rosalega flott armband í smíði -úr málmi, og svo fékk hann keðju til að setja hringinn sinn á þegar hann er að vinna þannig vinnu að hættulegt er að hafa hann á fingrinum.  Kaldhæðnislegt að ég fleygði hringnum mínum af mér daginn eftir að ég hafði keypt þessa fínu keðju handa honum.  Jæja en svo varð hann nú að fá eitthvað tæknidót svo ég fann ægilega fínt bluetooth headset, svona til að þurfa ekki að hafa heyrnatólin þegar við hringjum í gegnum tölvuna .  Hann var voða ánægður.  Gjöfinni (eða gjöfunum) fylgdi kort sem ég hafði séð áður sem mér fannst ferlega skemmtilegt.  Framan á því stendur 33 år gammel.  Inn í því stendur svo:

Allerede 33 og du kan stadig prale af

-en flot figur (uanset hvad du selv mener)

-at du er glad og positiv (især om morgenen) -(góður þessi, hehe)

-at du er i god form (især om aftenen)

-at du har et fantastisk kondital (du kan stadig feste igennem)

Så fuld fart frem mod de 34!!!

 

Skemmtilegt kort það :)

Pétur kíkti svo við um kvöldið og drakk nokkra afmælisbjóra með okkur.

Nú!...

Á föstudaginn fór svo Halldór niður í Óperu að hitta á liðið og vann fram á kvöld og ég skipti svo við hann þegar hann kom heim og fór til Lóu vopnuð einni rauðvínsflösku.  Við hugguðum okkur bara um kvöldið, Þröstur á einhverju tölvu-nörda-leikjasessióni og hann kom heim um það leyti sem ég ætlaði að panta mér bíl heim.  Halldór vakti mig svo um hálfellefu og við Eysteinn höfðum það voða notalegt um daginn, svona kósídagur.  Jódís Guðrún var með enn eina hitavelluna svo hún var hálfslöpp. Með póstinum barst þó pakki frá lögreglunni... sem innihélt veskið hans Halldórs.  Auðvitað allir peningar horfnir úr því en allt annað í því.  Þannig að hann þarf þá allavega ekki að panta nýtt ökuskírteini... það eina sem hann var ekki búinn að láta loka eða panta aftur .

Í dag er stelpan orðin hress svona að mestu og Halldór farinn að vinna aftur.  Ég hlakka voða mikið til að sjá sýninguna, en sýndar verða fjórar sýningar, frá þriðjudegi til föstudags.  

Fleira er ekki í fréttum að þessu sinni,

Verið þið sæl .