Þessi fallegi Dagur!

Það er sólskin, stilla og fallegt veður.  Ekkert planað í dag.  Við ætlum út að hjóla! 

Jólin eru alls staðar með jólamatinn og gjafirnar

Jóladagur:

Mætt hjá Sigrúnu og Andy rétt fyrir klukkan tvö þar sem Erla tók á móti okkur en hin öll voru í Íslendingamessu þar sem Sigrún var að syngja.  Dagurinn byrjaði með kaffi og kökum.  Þegar líða tók á daginn var lærið sett inn í ofninn og mynd sett í tækið.  Bubblur og snakk, Foi Gras og tilheyrandi, lífrænt danskt lambakjöt og heimatilbúinn eftir þetta allt saman.  Jii minn eini hvað ég var södd þegar öllu þessu var lokið, eða allt þetta var étið.  Og vegna þess að þessi fjölskylda er einstaklega eftirtektasöm voru jólagjafirnar sérlega viðeigandi þetta árið.  Tvö smellu-kökuform frá Sigrúnu, þar sem ég hafði fengið lánuð tvö.  Frá Erlu fékk ég kafaragleraugu svo ég gæti séð út úr augum ef ég lenti aftur í því að hjóla í snjókomu.. hún sagði að skíðagleraugun hefðu öll verið svo dökk.  Og auk þess fylgdi góð krukka af Foi Gras... hamminammm!!!  Eysteinn fékk rosalega flotta Nike hettupeysu frá henni í stíl við nýju skóna  og Tinnabók frá S+A.  Jódís fékk æðisleg föt frá Erlu og frábærar bækur frá Sigrúnu.  Já við vorum sko þvílíkt leyst út með gjöfum .

Annar í jólum:

Lóa og Þröstur komu svo klyfjuð spilum og matarafgöngum í gær sem við brytjuðum niður og settum í tartalettur.. sko bara matarafgangana, ekki spilin.  Það var þríréttað: Andatartalettur, hangikjötstartalettur og kjúklingatartalettur (sem ég bjó til því jólaafgangurinn okkar hafði klárast, hamborgarhryggurinn þ.e.)  Þetta var allt hvert öðru betra og svo til kláruðum við allt saman.  Bara nokkrar eftir til að narta í í dag .  Svo spiluðum við fram á nótt.  Voða voða gaman.

Jóladagurinn þriðji: 

Í dag er svo hangikjötsboð heima hjá Pétri en mamma hans og systir flugu hingað í gær og tóku með sér vænan skammt af hangikjöti.  Það verður voða gaman að sjá þau öll aðeins.

Svo er bara ekkert planað fram að áramótum þegar húsið fyllist af fólki hjá okkur.  Von á lágmark fimm ef ekki sjö manns til okkar í kalkún og áramótaskaup, það verður fjör!  

Jæja, gott að sinni

Bless í bili! 

Gleðileg jól!

Við gerðum þjófstart á jólin í gær þegar við fengum til okkar Einar og Mörtu í hangikjöt.  Sendingin hafði klikkað til þeirra svo við gátum ekki látið þau fara hangikjötslaus í gegnum jólin.  Og til að fullkomna það höfðum við laufabrauð með.  Við höfðum nefnilega verið hjá Sigrúnu og Andy kvöldinu áður og skorið út laufabrauð með þeim og Erlu og krökkunum sem flogið höfðu frá Frakklandi kvöldinu þar áður.  Sigrún og Erla steiktu svo herlegheitin og Sigrún gaf mér helminginn með okkur heim.  Þetta var alveg rosalega gaman, með eplaskífum og jólaglöggi .

Allavega.. Við borðuðum dýrindis hangikjöt og svo á eftir fórum við í pakkaleik sem þau kenndu okkur.  Þá hafði hver lagt einn pakka í pottinn og svo var teningaspil og mikil læti þegar verið var að stela pökkum hægri vinstri (já í allar áttir) undir mikilli tímapressu skeiðklukkunnar.  Þetta var alveg rosalega gaman.

Svo var kominn aðfangadagur jóla sem hófst með því að feðgarnir fóru í fótbolta en í dag var sem sagt leikur, feður á móti sonum.  Synirnir unnu leikinn en mér skilst þó að þetta hafi verið harður og jafn leikur.  Eysteinn stóð sig eins og hetja, líkt og alltaf, í markinu.  Á meðan á þessu stóð dúlluðum við stelpurnar okkur hérna heima við að skreyta jólatréð og taka til ásamt því að ég byrjaði að undirbúa matinn.  En þar sem jólamaturinn í ár var hamborgarhryggur þurfti svo sem ekki mikinn undirbúningstíma.  Já, jólagrauturinn í forrétt þetta árið og enn og aftur átum við of mikið af honum, öll nema Eysteinn sem hafði vitið fyrir sér og borðaði bara pent af honum og fékk þó möndluna.  Nei, hann var nefnilega hættur að borða þegar við lögðum spilin á borðið og enginn var með möndluna.  Hann tók þá eina skeið til viðbótar af disknum sínum og viti menn.. þar var hún .

Við gerðum það að ásettu ráði að fresta jólunum um klukkutíma.  Það er bara jólalegra að geta hringt þau inn með RUV og setjast að borðum og það var einmitt það sem við gerðum.  Kosturinn var náttúrulega líka sá að við græddum klukkutíma á því .

Eftir nartið í kjötið (því við vorum svoooo södd) nema Eysteinn.. hann borðaði, enda ekki að springa eftir grautinn, já þá var farið í pakkana.  Eysteinn mikið spenntur en þó farinn að ná að hemja sig og gerði sitt allra besta til að njóta hverrar mínútu.  Þetta var alveg dásamlegt.  Jódís fann sig alveg í pakkahlutverkinu, var orðin ótrúlega seig að rífa utan af gjöfunum og stundum mátti hún ekkert vera að því þar sem hver spennandi hluturinn á fætur öðrum var töfraður fram undan pappírnum sem hún bara varð að fá að handfjatla og skoða.  Hreint dásamlegt að fylgjast með henni.  Eysteinn var svo ánægður með sínar gjafir að hann var að springa og við bara öll.  Þvílíkt flottar gjafir sem við fengum frá öllum.  Og, þetta voru góð bókajól.  Ég fékk frá þeim nýju Dan Brown bókina, Det forsvundne tegn, eða Týnda táknið eins og ég held hún heiti upp á íslenskuna.  Ég hafði svo keypt nýju Carlos Ruiz Zafón bókina, Leikur engilsins, handa honum og pabbi gaf okkur nýja Arnald.  Börnin fengu fullt af bókum líka, svo öll munum við liggja í bókum öll jólin .  Ég get hreinlega ekki beðið eftir að leggjast uppí og byrja að lesa Arnald, því ég veit að ég fæ ekki Carlos Ruiz fyrr en Halldór er búinn, enda við búin að bíða eftir þessari bók í nokkur ár .  

Jódís mátti ekkert vera að því að fara að sofa og náðum við að setja hana upp í klukkan hálf tólf þegar hún var orðin gjörsamlega stjörf í framan (þó ekkert pirruð samt), með því að setja nánast allar gjafirnar hennar í rúmið með henni, hún bara VARÐ að fá að skoða þær allar svolítið lengur .

Á morgun er svo jólaboð hjá Sigrúnu og Andy og ég hlakka mikið til að eyða deginum með þeim.  Heimalagaður ís er okkar framlag í boðið .

Læt fylgja nokkrar myndir frá deginum

 

Elsku fjölskylda og vinir.  Okkar bestustu bestu óskir um gleðileg jól og áframhaldandi gleði eftir þau.  Tölvuknús verður að duga í bili þar til við hittumst næst.

Góða jóla-nótt! 

 

Aðventan

Börnin voru lengi að ná veikindunum úr sér og Jódís Guðrún nældi sér í sýkingu í tannholdið sem varð til þess að lakið var allt út atað í blóði eftir hverja nótt.  Með pensillíni (sem ég held að sé fyrsti skammturinn hennar.. ef minnið svíkur mig ekki) náði hún þó þessu úr sér en það var ekki auðvelt að koma því í hana.  Halldór greyið mátti standa í því að ganga með hana milli lækna meðan ég var í húsmæðraorlofi á Íslandi.  Ég þurfti að hafa mig alla við til að vera ekki að farast úr samviskubiti yfir að skilja hann einan eftir í þessum aðstæðum.  Það gekk að mestu leyti, þó ekki öllu.  En hann var hinn rólegasti yfir þessu öllu saman þegar ég kom aftur heim.  

Ferðin til Íslands var hreint dásamleg.  Pabbi var svo yndislegur að sækja mig á völlinn og skutlaði mér beint í mat á Núðluskálina þar sem ég fékk bæði að knúsa Sigga og Kristján auk þess sem ég náði að metta hungraðan munn eftir flugið.  Jiii hvað þetta er flott og gott hjá þeim!!!  Um kvöldið fór ég svo með Gullu út í Viðey þar sem hún var að leiðsögumannast í friðarsúluferð og var það rosalega næs þar sem hópurinn var fámennur og því túrinn miklu persónulegri.  Það var alveg frábært og algjör stilla á eynni.  Flott að sjá súluna, mánann og smá norðurljós samankomin þarna fyrir ofan eyna.  Daginn eftir fór ég með rútunni strætó á Selfoss og beint á jólatónleika í Selfosskirkju þar sem öll fjölskyldan svo til báðum megin var samankomin í söng og hljóðfæraleik.  Rosa gaman að hitta þau svoleiðis  og kvöldinu eyddi ég í Baugstjörninni með tengdafjölskyldunni.  Ofsalega notalegt, eins og alltaf .  Ég hitti svo Betu og Heiðu daginn eftir og fékk svo far með Önnu Árna í bæinn aftur.  Ég var svo bara í Reykjavík alla vikuna þar til ég fór og gisti hjá Sigga og Kristjáni og borðaði í Núðluskálinni.  Náði svo til að prufa alla réttina  sem hverjir voru öðrum betri.  Alveg hreint yyyndislegt að vera hjá þeim strákunum og henni Úmu litlu.  En sex dagar eru afskaplega fljótir að líða, sérstaklega þegar maður hefur það gott og gaman, og ég var í flugvélinni á leiðinni til Kaupmannahafnar aftur áður en ég vissi af.

Jódís Guðrún fór loksins á vöggustofuna aftur á mánudaginn og er búin að vera hin hressasta.  Hún var búin að bæta heilum helling við orðaforðann á þessum stutta tíma og þá aðallega í boðhætti: Farðu! Komdu! Sestu! Fram! og fleiri orð sem hún notaði til að skipa föður sínum fyrir verkum.  Henni fannst með hreinum ólíkindum hvað ég gat verið ósvífin að hlýða henni ekki á stundinni þegar hún ætlaði að reyna þetta á mig.  En þetta er allt á réttri leið núna þegar hún er að hressast.  Sumt má bara þegar maður er lasinn, það verður að lærast .

Já stelpan bara hætt með bleiu og hefur gengið alveg rosalega vel.  Á sunnudaginn í strætó þurfti hún að pissa og ég sagði henni að hún væri með bleiu og hún mætti alveg pissa bara í hana.  Neibb.. bleian var þurr þegar við komum heim og hún pissaði í klósettið.  Hélt bara í sér.  Hins vegar gleymdi hún sér eitthvað á mánudeginum á vöggustofunni og ,,lavede stort" eins og þær segja þar, beint í nærbuxurnar og sokkabuxurnar.  Ég fór í gær til að fjárfesta í fleiri nærbuxum þar sem það gengur ekki fyrir hana að vera í samfellum þegar  engin er bleian.  Gallinn er bara sá að það er ekki gert ráð fyrir að svona litlar og nettar stelpur hætti á bleiu.  Minnstu nærbuxurnar eru að lágmarki númeri, ef ekki tveimur númerum of stórar á hana svo þær hanga alveg utan á henni.  Hún vex í þær .  

Loftslagsráðstefnan er enn í gangi hér, eins og flestir vita, og varð ég vitni að ægilega miklum mótmælum á Nørreport í gær þar sem allar götur voru lokaðar og álíka margir lögregluþjónar og mótmælendur á svæðinu.  Hér eru sko engir sénsar teknir og er daglegt brauð að sjá litla rútu-kálfa þjóta framhjá manni fulla af löggum með sírenur í botni og blikkandi ljós.  Ég hef líka séð talsvert af lögreglurútum og mikið um að heimavarnaliðið sé á rölti með lögreglunni.  Allt fullt af löggum alls staðar niðri í bæ.

Svo byrjaði bara að snjóa í gær en fyrir alvöru um það leyti sem ég var að hjóla með stelpuna á vöggustofuna í morgun.  Mig sárvantar skíðagleraugun mín þar sem öll snjókornin hreinlega soguðust að augunum á mér þannig að ég átti í mestu vandræðum með að halda augunum opnum.. sem er viss galli þegar maður er að hjóla.  Og það er bara allt að verða hvítt hérna og mér sýnist á veðurspánni framundan að við gætum bara fengið hvít jól hérna, allavega á að vera frost alveg fram að Þorláksmessu en þá gæti reyndar snjónum rignt burtu.. kemur í ljós .

Jæja, gott að sinni

Bless í bili! 

 

Veikindi á heimilinu

Mikið kvef búið að hrjá börnin á heimilinu og Jódís var svo komin með hita í gær.  Eysteinn var orðinn slappur en fór þó í skólann og í nótt var hann svo kominn með rúmlega 39 stiga hita.  Svo þau eru núna bæði heima, Eysteinn inni hjá sér í Playstation og Jódís Guðrún við sjónvarpið að horfa á Nemó... enn eina ferðina .  Röðin er sem sagt Stubbarnir -> Bangsímon -> Nemó.  Spurning hvað tekur við eftir Nemó.  Allavega víst að ég verð það verður þá spilað nógu lengi til að ég geti lært það utanbókar.  En það er voða gaman að henni.  Í ,,skelfilegu" atriðunum heyrist í henni ,,Ó nei!" og stundum, ef hugrekkið bregst henni, kemur hún hlaupandi í fangið á manni til að vera á öruggum stað meðan skelfingin á sér stað.  

Þröstur kíkti í heimsókn til okkar í gær og var mjög svo imponeraður þegar hún aðspurð sagði hann heita ,,Höstur".   Fannst hún geta sagt nafnið betur en fullorðinn Daninn.  Sjálf heitir hún hins vegar Údís.  

Við foreldrarnir höfum sem betur fer sloppið við veikindin að mestu hingað til og nú er ég bara að vinna hörðum höndum að því að verða aaaalls ekki veik, því ég ætla EKKI að eyða dögunum á Íslandi lasin . Ég kem sumsagt á laugardaginn og verð í tæpa viku.  Ég hlakka náttúrulega voða mikið til að ná mér í smá íslenska jólastemmningu til að taka með mér út aftur (og kannski eitthvað ilmandi jólalegt líka )

Jæja gott að sinni

Bless í bili! 

Friðurinn úti!

..Ekki að það hafi svo sem verið mikill friður fyrir en allavega, í gær var búið að lesa fyrir stelpuna og hún komin uppí og allt í góðu.  Halldór var nýbúinn að segja hversu mikill munur það væri eftir að við byrjuðum að lesa svona fyrir hana á kvöldin, bara hægt að fara í gegnum þessar bækur sem hún á, svo bara hægt að leggja hana og hún sofnar.  Skyndilega og allt í einu birtist mín bara á stofugólfinu, ægilega ánægð með sig. ,,Hæ!" segir hún og skælbrosir.  Já, búin að læra að klifra yfir rúmið.  Og svo gerðist þetta aftur.  Og núna í kvöld kom ég að henni hálfnaðri yfir rúmið.  Úfff.. segi nú bara ekki annað .  

Annars erum við að reyna að venja hana af bleiu meira og minna og tökum við bleiuna af henni þegar hún kemur heim af vöggustofunni.  Það hefur gengið svona líka glimrandi vel og sest hún á koppinn í hvert sinn sem hún þarf að pissa.  Hún á það þó til að gleyma að hún sé bleiulaus en það gerist þó ekki oft .  Þær eru líka með átak á vöggustofunni að setja börnin oftar á klósettið og gengur bara voða vel.  Væri þægilegt að hafa eitt svona krílaklósett á heimilinu .

Foreldrafundur í skólanum hans Eysteins á mánudaginn og hann kemur svona líka vel út.  Kennararnir mjög ánægðir með hann að svo til öllu leyti, auðvitað alltaf eitthvað sem má gera ögn betur, en hann er að leggja sig vel fram og að skila góðum verkefnum í skólann.  Auk þess sem hann er félagslega mjög vel staddur, sem við vissum svo sem vel .  Hann byrjaði í aukatímum í dönsku í byrjun mánaðarins og fer þrisvar í viku.  Honum líkar bara mjög vel við það og finnst kennarinn góður.  Sem er náttúrulega bara frábært!

Skruppum niður í bæ í gær og er verið á fullu að gera jólalegt í gluggum og götum.  Ægilega skemmtilegt .  Mest langar mig þó að stela þessum rósum sem eru úti í garði hjá okkur og setja þær í vasa hjá mér, en þori því nú samt ekki alveg... aldrei að vita hvernig stemmningin fyrir því verður á morgun .

Gott að sinni

Bless í bili! 

..the badest blogger in the whole damn town!

Sko... svo við byrjum nú bara á byrjuninni:

Við sem sagt misstum sjónvarpsmerkið (þar sem öllu var breytt í digital 1. nóv) og vorum þá búin að panta einhvern sjónvarpspakka hjá fyrirtæki sem heitir Canal Digital.  Það átti að taka einhverja fjóra daga svo við sáum fram á að vera sjónvarpslaus í tvo daga (því við erum alltaf svo snemma í því og ákváðum okkur því með ,,góðum" fyrirvara ).  Svo hringdi maður í mig frá Canal Digital og bað mig um að tékka á því hvort það væri diskur á þakinu frá þeim.  Jújú, það var svo.  Hann sagði að þetta myndi dragast eitthvað á langinn og það kæmi maður eftir 3 vikur að setja þetta upp hjá okkur.  Ég stóð bak við hús og Halldór inní eldhúsi hinum meginn hússins þegar hann sagði þetta.. því Halldór heyrði mig segja tilbaka ,,TRE UGER!!!?" Svo hissa var ég!  Við mundum þá að Rakel (sú sem átti íbúðina) hafði sagt okkur að þau hefðu verið með disk og milljón stöðvar svo ég skrifaði henni og spurði hvort það hefði kannski verið Canal Digital.  Jújú, það passaði, þau létu setja þennan disk upp.  Við ákváðum þá að velja besta veður-daginn sem komið hefur þetta árið í Kaupmannahöfn, til að fara leeeengst út á Amager í einu búðina í borginni sem hægt var að sækja útbúnaðinn.  Jújú, það var nýstingskuldi, rigndi og snjóaði á víxl og blés á okkur eins og gegn greiðslu!  

Nema hvað.. jújú.. við finnum búðina (sem var ca. 10 mín gangur frá Metró-stöðinni) og ég skrifaði undir einhverja pappíra og spurði hvort ég væri ekki örugglega bara að kaupa áskrift.. það væri ekki verið að lauma einhverri íbúð inná mig í leiðinni.. svo margar voru undirskriftirnar, og hann kom með riiiiiiisa kassa fram með útbúnaðnum  þegar ég ætlaði að fara að borga fyrir það.  Neibb.. tók BARA Dan-kort! og hraðbanki.. hmmmm... fimm manns inní búðinni og enginn mundi eftir hraðbanka í margra kíílómetra fjarlægð .  Svo úr varð að ég fór heim á leið til að sækja stelpuna úr vöggustofunni og Halldór í Fields.. sem var næsti bær við, og tók út pening og fór svo tilbaka að borga.  Veðrið var EKKI að skána og ég hjólaði frá lestastöðinni eftir stelpunni og heim og ég var svooooo fegin þegar ég kom heim og gjörsamlega búin á því eftir að hafa hjólað móti vindinum.  Já, í Kaupmannahöfn er ALLTAF mótvindur, sama hvort maður fer suður, norður, austur eða vestur.  Ég hringdi í Halldór sem var í metró-num með litla kassann (já ég gleymdi.. við báðum um að fá bara boxið þar sem við værum með disk uppá þaki en það var ekki hægt).  Hann kom svo heim einhverjum klukkutíma seinna... meeð flykkið!  Þá höfðu lestirnar hætt að ganga í einhvern tíma og Halldór þurfti að troðast með kassann í smekkfullan strætóinn og var að hans sögn ekki vinsælasti maðurinn í strætó þennan daginn!  Venjulega er nú mikið í 6A strætónum en þar sem lestirnar gengu ekki var svona þróunarlanda-mikið í strætó.  

Við áttum það nú alveg skilið að Halldór tengdi boxið og það gekk allt upp í fyrsta!  Og það skemmtilega er að við keyptum minnsta pakkann (sem er þó með 23 stöðvum) en fengum stærsta pakkann, með yfir hundrað stöðvum.  Ég býst nú samt við að þetta sé bara til að lokka og auglýsa, að við missum hann von bráðar.  Við kunnum bara ekkert á að vera með svona margar stöðvar!  Ég fletti svona upp að 20 fyrstu stöðvunum og svo aftur niður .  Þetta er aaaallt of mikið.. en ég svo sem kvarta ekki .  Meira að segja er Ruv inná en ég held það sé bara ekki merki svona langt.  En við getum hins vegar hlustað á rás 1 og 2 í gegnum útvarpið á disknum .  Þannig að við vorum bara sjónvarpslaus í einhverja 5 daga.

Nú! Á fimmtudaginn í þarsíðustu viku var öllum foreldrum boðið í Holbergskolen til að sjá afrakstur Klima-uge (Loftslags-viku) en það er allt búið að vera kreisí hérna út af þessari Klima-ráðstefnu sameinuðu þjóðanna sem halda á hérna í Köben í desember.  Allir bekkirnir voru búnir að gera plaggöt og myndbönd og tilraunir sýndar á tilraunastofunni og ég veit ekki hvað og hvað.  Eysteinn var hins vegar í Klima-koret, eða Loftslags-kórnum, sem hafði æft stíft alla vikuna og spilaði hljómsveit með.  Eysteinn komst að því að íslenskur strákur sem hann hafði hitt í klúbbnum á síðasta ári, var semsagt í 9. bekk í skólanum.  Freyr heitir hann og hefur búið hérna frá því hann var sex ára.  Allavega, þetta var svooo flott hjá þeim.  Þau sungu Michael Jackson lagið Earth song sem búið var að yfirfæra á dönsku og þetta var svoooo flott hjá þeim að maður fékk alveg gæsahúð!  Rosalega vel útsett hjá tónlistakennaranum og einsöngur krakka á hárréttum stöðum!  Hérna er lagið hans Michaels heitins til upprifjunar 

Rúm vika fór í klima-uge hjá skólanum og var ein venjubundin kennslustund á dag, annars var vikan undirlögð í þetta og það er þetta sem ég kann svo að meta við skólastarfið hérna og allt tengt börnum, það er svo gríðarlega mikið lagt upp úr þessu og mikill metnaður sem liggur í vinnunni, og svo sannarlega sá maður afrakstur þess á sýningunni, hvort sem var hjá 1. bekk eða 9. bekk.  Alveg ótrúlega flott!

En svo við færum okkur nær deginum í dag.  Í síðustu viku voru stór plaggöt uppi á vöggustofunni sem minntu foreldra á að koma með börnin sín í druslufötum þessa vikuna þar sem það væri listavika.  Á föstudaginn var svo búið að hengja borða yfir öll plaggötin sem á stóð ,,Udsat" eða Aflýst!  Ástæðan, jú, fjárlögin voru komin fyrir næsta ár og það er svo gríðarlegur niðurskurður að það sér fram á að allar ferðir, listavika, og allt sem gert er fyrir börn utan hefðbundinnar gæslu verði lagt niður.  Störfum verður fækkað og við þurfum að fara að koma með bleiur með okkur (sem mér fannst svo hriiikalega þægilegt að þurfa ekki að gera).  Það er búin að vera gríðaleg reiði bæði hjá foreldrum og fóstrum og voru mótmæli við ráðhúsið á mánudag og verkfall í leikskólum víða um borg á þriðjudag.  Í dag var svo boðað til skyndiforeldrafundar þar sem á að reyna að ná sterkari samstöðu gegn niðurskurðinum.  Þetta er sparnaður upp á margar milljónir íslenskar, fyrir hvern leikskóla/vöggustofu fyrir sig.  Sjáum hverju þetta skilar .  Leiðinlegt bara að taka allt það í burtu sem manni fannst svo yndislegt við leikskólann hérna og setti hann skörinu ofar leikskólum á Íslandi.  T.d. var árleg fjöruferð í leikskólanum hans Eysteins, ekkert annað.  Hérna er jólaferð, haustferð, vorferð á bóndabæinn, farið í Dýragarðinn á sumrin o.s.frv.

Jæja.. ég held ég sé búin að blogga fyrir gatið sem komið var .

Gott að sinni

Bless í bili! 

Nu slukker analog TV signal

...og þá erum við orðin sjónvarpslaus í 10 daga 

Helgin

Ég fékk hana Mörtu vinkonu til að draga mig út á lífið á föstudaginn.  Það var nú lítið mál!  Hún fór með mig á pöbbarölt og upphafsstaðurinn var staður þar sem maður pantar bara á íslensku á barnum .  Það var svo rosalega gaman um kvöldið að það var næstum því þess virði að bíða í tæpt ár eftir því .  En laugardagurinn var náttúrulega að mestu (ja eða alveg) undirlagður í eintóma leti á eftir .  Við Halldór röltum okkur svo til Lóu í kaffi á sunnudag með litla skott sofandi í kerrunni sinni á meðan Eysteinn var að verja eins og óður maður á fótboltamóti.  Hann kom heim forugur upp fyrir haus enda var búinn að vera rigningarsuddi allan daginn.  En hann var samt nokkuð ánægður, þrátt fyrir mikið ,,dómarasvindl!" Jódís var farin að hósta svo ægilega mikið auk þess sem stanslaust rann úr nefinu á henni að við ákváðum að halda henni bara heima í dag.  Hún verður vonandi orðin skárri í fyrramálið, mér finnst allavega hóstinn orðinn minni.  

Klukkunni var breytt í gær svo nú erum við einungis klukkutíma á undan íslenska tímanum sem er voða gott.  En jiminn hvað er farið að dimma eitthvað núna og þeir eru svo ægilega sparsamir á lýsinguna hérna að það er bara kolniðamyrkur úti.  Þá er bara að kveikja á kertum innandyra og gera kósí hjá sér .  

Annars bara allir kátir og hressir og biðja fyrir kveðjur heim 

Gott að sinni

Bless í bili! 

Ókey, ókey, ókey, ókey!!!

...ég skal blogga! 

Það er nú samt ekki mikið að frétta af okkur.  Jú, Halldór er farinn til Íslands.. og kominn aftur, gekk vel með mikilli hjálp fjölskyldu og vina að parketleggja og ganga frá því sem þurfti að ganga frá á þessari rúmu viku sem hann var heima.  Þvílíkt sem við erum auðug af góðu og hjálpsömu fólki í kringum okkur!  Ástarþakkir!!!!  (vantar knús-kall).  

Á föstudaginn, eða daginn eftir að Halldór kom, tókum við lestina til Horsens að heimsækja Albertu vinkonu sem býr þar ásamt tveimur dætrum í voða kósí stúdenta-raðhúsi.  Þar eyddum við helginni í góðu yfirlæti og nutum þess að vera saman.  Við erum orðin svo ægilega slöpp í drykkjunni að á tveimur kvöldum náðum við að klára eina rauðvínsflösku og tvo bjóra .  Við kenndum þeim teningaspilið góða sem Hrefna kenndi svo vel á ættarmótinu í sumar og bæði Eysteinn og Amelía, níu ára dóttir Albertu, fengu að spila með til að verða þrjú um nóttina.  Ægilega gaman .

Halldór byrjaði svo að vinna á fullu strax á mánudeginum og búinn að vera að vinna alla vikuna.  Nóg framundan.  

Veðrið fremur kalt og hráslagalegt, rigningarsuddi og 8 stiga hiti .

-Ég sagði það... það er EKKERT að frétta!!!  Aðalfréttirnar liggja hjá Sigga og Kristjáni sem eru að fara að opna NÚÐLUSKÁLINA!!!!  Ég er bara  svoooo spennt fyrir þeirra hönd! 

Gott að sinni!

Bless í bili!!!